同完JW玩下水禮　陳瀅疑真空上陣晒肚兜

早前，朱敏瀚（朱仔）、周嘉洛、王灝兒（JW）及陳瀅4個好友齊齊飛泰國清邁拍攝旅遊節目，不過睇嚟就玩得意猶未盡，尋日（15日）JW仲喺社交網晒清邁性感水着，大騷香肩美背繼續回味旅行點滴之際，話咁快陳瀅就已經去咗馬來西亞吉隆坡暢玩，為開工前叉足電準備！

去咗吉隆坡拍劇嘅陳瀅，簡直可以話係「時間管理大師」，將寓工作於娛樂展現得淋漓盡致，事緣尋日（15日）陳瀅就喺社交網晒出一張着紅色肚兜襯淺色牛仔褲嘅靚相，並問吉隆坡嘅網友有無景點、美食推介，不過睇嚟陳瀅件肚兜實在太搶Fo，搞到網友錯重點喺肚兜上面，紛紛激讚：「有復古風又好靚，不過我想看看你背脊，請轉身。」、「現代肚兜。」