任暟晴唔驚同炎明熹爭資源　暑假陪家人唔吸金

「聲夢」第二屆冠軍任暟晴（Jasmine）今午於觀塘舉行慈善粉絲見面會。3個月未有與粉絲見面的她，甫開始唱歌咪高峰便出現問題，她指演出經常有類此情況，故不當一回事，而全程她由「星媽」Ada陪伴，受訪時Ada更就囡囡事業發展多次插口大聲解釋，例如「佢未簽任何公司啫」、「不如問番今日個活動啦」。

Jasmine透露暑假後將升讀中六，這個長假行程相當緊密，包括要去寫字樓實習，以及與家人去東京、韓國旅行。至於音樂事業發展，似乎得獎後一直工作不多，她坦言是自己不想忽略學業，故目前盡量學業、事業兩邊兼顧，又透露9月將再有慈善活動演出。當談到唱片合約問題，她說：「呢方面暫時未有安排，不過我係無綫合約藝員。（冇食住個勢開始喎。）順其自然啦，可能等讀完書先，因為唔係我一個人嘅決定。（暑假都唔集中火力做嘢？）事關幾年冇同屋企人去旅行，我哋有十幾個親友一齊出發，陪吓公公婆婆。（係唔係擔心？如果簽約無綫啲資源會去晒炎明熹嗰邊？）唔關事，純粹係之前冇時間去傾，我唔係唔簽，係乜都未簽啫。」