49歲蒙嘉慧素顏被捕獲　真實狀態嚇窒網民

蒙嘉慧（Yoyo）2013年同鄭伊健結婚之後就淡出娛樂圈，依家主力喺日本打理生意，粉絲們想見佢就要靠彩數。前日(15日)就真係有網民出甫，話喺香港機場野生捕獲Yoyo，見佢素顏上陣又冇戴口罩，完全無懼以真面目示人。全黑色裝束低調又樸素，不過仍然好有氣質，皮膚望落都好緊緻，完全唔似準備踏入50歲！

不過都有人覺得Yoyo肥咗好多，其實睇返佢早幾個月現身撐場鄭伊健演唱會嘅相，已經面圓圓明顯大隻過以前好多。

Yoyo成為鄭太之後都冇刻意keep fit架啦，唔使出鏡之餘同鄭伊健日日sweet，今年結婚10周年Yoyo仲激罕喺社交網放閃。Yoyo都曾經自爆鄭伊健話佢肥，咁搞法幸福肥都好正常啫！