星玄︱楊茜堯連續兩劇被飛走　時來運到有轉機

今日係7月18號，即係農曆六月初一，適合、理髮同開市。最旺生肖係猴，屬猴嘅人今日桃花旺，單身嘅你有機會遇到心儀對象。

吳若希（Jinny）就係屬猴，早前佢推出新單曲《三人之境》，喺解釋創作靈感嗰時，就話唔係你嘅始終唔會係你，仲叫啲小三要知碇，唔知係咪暗示緊啲咩呢？Jinny仲爆結婚之後有男人明知佢係人妻都照樣「兜搭」，不過Jinny就會答對方：「你當我老公死㗎？」吳若希仲話非常信任老公何兆鴻，亦大讚另一半嘅婚姻保鮮能力。如果Jinny今日真係遇到意中人，佢老公都應該幾驚。

今日幸運星係處女座，你哋嘅運氣好到不得了，事業發展有機會更上一層樓。楊茜堯就係處女座，上年年底傳出楊茜堯同佘詩曼，雙雙被無綫邀請返娘家拍攝劇集《新聞女王》，不過最後楊茜堯冇份，就連《家族榮耀》續集《家族繼承者》嘅女主角，都落埋佘詩曼手上，雖然楊茜堯錯失咗演出機會，不過今日事業運咁好，可以出去見多啲製作人，話唔定有突破性嘅角色安排畀你。