蘇菲亞維嘉娜同Joe Manganiello宣布離婚　婚後真性情頂唔順

電視劇《摩登家庭》（Modern Family）51歲哥倫比亞女星蘇菲亞維嘉娜（Sofia Vergara）與電影《光豬舞壯士》（Magic Mike）系列46歲美國男星Joe Manganiello推出聯合聲明，宣布結束7年婚姻：「我哋作出離婚嘅艱難決定。作為兩個好愛同關懷對方嘅人，我哋懇請大家尊重我哋私隱，等我哋開展人生新一章。」兩人未有兒女，而蘇菲亞與前夫育有1子。

知情者透露兩人分手原因：「Joe係個大細路，佢鍾意玩《龍與地下城》，鍾意摔角、打機、超級英雄片、漫畫、睇騷、睇美式足球，佢鍾意好玩……佢同蘇菲亞係完全兩種人，一開始係互相吸引，蘇菲亞都鍾意出去玩，但佢較為關注享受生活，去旅行、食貴晚餐、做明星同所有名氣帶嚟嘅嘢。佢成世人都被人讚佢超級索同靚女，已經上晒腦，佢又大脾氣，好容易為小事發嬲，Joe份人就好隨和。一開始兩人熱戀時唔覺，但當真性情開始浮現，佢哋都頂唔順對方，寧願工作都唔見面。」