黎耀祥變身「飲食KOL」　街邊爆汗食粥好滋味

近年轉戰內地發展嘅3金視帝黎耀祥（祥仔），與老婆梁耀蓮（Julia）變身「飲食KOL」，拍片食勻中國各省。日前佢就介紹中山美食，向來對粥麵情有獨鍾嘅祥仔現身街邊食消夜，見佢一身街坊Look，喺30幾度高溫下，嗌咗碗豬骨粥。雖然食到大汗疊細汗，但佢依然樂在其中，一臉津津有味。之後佢又搞笑話：「如果呢度有埋冷氣真係無得頂啊！」期間有唔少粉絲搵佢影相，但佢都有求必應，任影唔嬲，認真親民！