劉倩婷李丞責瑞士慶祝結婚10周年　難忘生左兩個女

前港姐劉倩婷孖老公李丞責下午出席元宇宙頒獎活動。談到早前飛往意大利參加甄子丹結婚20周年「婚宴」，劉倩婷表示相當難忘：「佢哋兩公婆有商量咁去決定所有，仲要預咗9個月時間嚟籌備，連布置用嘅花都喺世界各地運嚟，真係好浪漫。」問到他朝結婚20周年時，會否效法對方，李丞責笑說：「我哋年年都好sweet，不過可能喺大牌檔，哈哈！其實我都想，最緊要睇太太嘅決定。」

原來今年2月2日乃二人結婚10周年，劉倩婷謂：「不過當時我哋冇乜點慶祝，反而今次趁歐洲行，我哋都有帶埋大女一齊去咗瑞士，全程玩咗十幾日，因為當年我哋拍拖都去咗幾次瑞士，嗰度好多回憶。（唔帶埋細女？）佢要等戒尿片，同埋仲要飲奶瞓嘛。（10年最難忘係啲咩？ ）梗係生左兩個女啦。」