樂宜化身火辣蜘蛛女　羅毓儀變身「蝴蝶忍」對撼

動漫節現正舉行，唔少人都入場大玩Cosplay，連圈中女星都玩埋一份，DJ女神樂宜化身「蜘蛛女」，着上超貼身Spider Gwen戰衣，雖然全身包到冚，但緊身剪裁就令其身形曲線一覽無遺，由於佢戴上面罩，好多粉絲都話同佢擦身而過：「原來琴日擦身而過咁索嘅spider Gwen係你」、「原來你喺我哋面前，見你勁nice同小朋友影相，原來係你！！」另外，樂宜亦有扮演「緋紅女巫」，同樣咁索。

同場熱愛日本動漫文化嘅無綫小花羅毓儀（Yuki）都有參戰，佢就變身《鬼滅之刃》嘅「蝴蝶忍」，見佢手持日輪刀，露出銳利眼神又不失可愛，真係入型入格！