姜濤登場勁歌熱舞炸爆舞台　全身包到冚體態回勇

男圑MIRROR「人氣王」姜濤假亞博展開一連4場首次個人演唱會，之前曾傳出門票滯銷傳聞，但是晚全場爆滿，而由啡髮變挑染銀髮的他，身穿日式裝束全身包到冚示人，腰間更綁上粗腰帶求修身效果，他邊唱首唱的主題曲新歌《濤》，邊由兩位「力王」男舞蹈員抬起並坐在其膊上，另有兩名男舞蹈員幫手扶住姜濤背脊。期間有煙火效果，加上共10多名舞蹈員翩翩起舞，凸顯其王者風範，之後他側躺在白布上，再由多位舞者顯示的「力的表現」，於白布後托起姜濤，營造出凌空視覺效果，而舞台另一邊則飄起透明布營造波濤感覺。

姜濤唱畢《作品的說話》及《Master Class》，換上另一套黑衫演繹已故歌后鄧麗君的《我只在乎你》後開腔，感謝入場觀眾，又謂：「創作圑隊一開始問我主題，我kick咗好耐，可能今年好多嘢都kick　kick哋，令自己喺創作方面冇乜靈感，最後創作靈感就喺我個名入面『濤』，因為過去一年無論個人及圑隊經歷好多浪濤，希望可以似水一樣有一萬種形態去接受所有批評及指點，為大家帶嚟唔同音樂種類，就好似水，不分流行、古典融合一齊，希望大家enjoy。」姜濤跳唱共20首歌曲，曾揚言不想再唱的《蒙着嘴說愛你》，則安排在個唱中壓軸獻唱。

有腳傷在身的他接連跳唱《鏡中鏡》及《DUMMY》兩首歌，跳到大汗淋漓，他表示：「好榮幸生為歌手，因為人太多情緒，作為歌手可以將情緒全部寫喺歌入面，多謝幕後團隊幫我寫歌，最緊要喺歌中找到共鳴，無論犯錯定成功都要保持謙卑，呢個係我成日提醒自己，我永遠都會記得自己曾經係個Dummy。」接著他以重量級人物去形容嘉賓肥仔，肥仔出場時笑言：「我第一次感受到徒弟粉絲嘅力量。」隨即用毛巾為姜濤抺汗，抺汗後肥仔拿出筆要求對方在毛巾上簽名，姜濤即說：「綵排嗰時冇架喎！」肥仔揚起毛巾說：「唔知今晚會有幾多DM？！」粉絲即時尖叫，肥仔再並度為姜濤抺汗說：「唔夠汗味，索多兩下。」肥仔稱經常收到人問他何時可以跟姜濤表演《特務肥姜2.0》，又指對方承諾一定會邀他在個人演唱會上擔任嘉賓，兩人合唱《特務肥姜2.0》。

姜濤唱出《好得太過份》前，現場播出片段，片中姜濤拿着應援燈牌及疊櫈在零晨3時35分的銅鑼灣街頭體驗姜糖生活，他將應援牌高舉過頭，笑言這是最漫長的20分鐘，又謂：「好攰，姜濤好乞人憎！」其後他真情剖白說：「好對唔住大家，我應該留耐啲，諗起佢哋咁樣去逼有啲心噏，只係知自己做歌表演就足夠，其實好唔足夠，尤其呢兩年好驚同無自信去面對大家，好對唔住大家，唔應該懷疑大家喺唔喺度，應該同大家緊密多啲，由依家起我要將你哋變成我生命中真正家人，辛苦你哋！」說到中段他已忍不住哽咽，現場粉絲無不感動到眼濕濕。唱完《好得太過份》後，姜濤一度眼濕濕表示歌曲是他送給大家：「你哋真係好得太過份，每一位無論係咁多年支持我或者中途離開，我都好感激，喺你哋生命出現過好滿足，由呢刻起你哋唔係我粉絲，而係我家人，有錯我哋互相提點，一齊加油。」

出名Talk得的林海峰接力擔任第二位嘉賓，並將現場變為個人棟篤笑，成為高潮之一。現場先播出2020年叱咤樂壇流行榜頒獎禮片段，當時由林海峰頒發我最喜愛的男歌手給姜濤，其後林海峰現身，全場反應熱烈。林海峰表示：「我等咗3年，2020年佢第一次攞，因為疫情現場畫面有遺憾，如果有你哋係咪更好，我等咗3年，齊人係咪？今晚再頒過。」他稱要重現當日頒獎情況，又問姜濤：「你使唔使落台下叫你上嚟，做唔做到當日個表情？」姜濤反問：「咩表情呀？」

跟着林海峰開始個人表演一輪嘴說：「呢3年你（姜濤）好辛苦，但個獎唔止係屬於你，而係姜糖，佢哋係用作品說話，作品仲多過姜濤，你哋買幾多牙膏？食咗幾多炸雞？飲咗幾多汽水同啤酒？買幾咗份保險？做咗幾次body check？呢啲咪係用作品說話囉！你哋好勤力，樂壇需要你哋。」他續指姜糖不但為廣告界帶來新面貌，亦為廣播道帶來新面貌：「商台因為你哋換咗鐵閘，我喺商台30幾年，商台只係會換廁紙同主持人。你哋好犀利，前排30幾度，個個都係熱暑人，但無人暈，所以姜濤你都唔可以暈。」

他稱姜糖有另一個作品，就是一年一度將銅鑼灣變成姜濤灣：「銅鑼灣揸弗人係邊個？唔係浩南，唔係大佬B，而係姜B。」至於最重要作品則是一年一度叱咤頒獎禮：「我頒完獎畀姜濤，我人氣高好多，事業創新高峰，社交網留言全部話感謝林公子咁愛錫姜濤，我得獎都無咁多留言，最多嘅留言係樂壇已死、林狗得獎天理不容，所以我寧願頒獎都唔想得獎。我有冇獎唔緊要，我有冇獎頒畀姜濤先緊要，所以姜濤你唔係要努力成亞洲第一或者紅過羅湖，而係要努力成就我，所以個獎係屬於我，我依家將個獎畀你頒畀我，我係最喜歡歌手嘅最喜愛頒獎喜賓。我答應大家會努力頒獎畀佢，我會孝敬後輩，冇你冇我。」他笑言宣布舉行個人演唱會，還惡搞姜濤的演唱會海報變成自己個唱海報。

姜濤全程未能插口，只能在旁看着林海峰表演，演講完後林海峰表示明天要趕返工便匆匆落台，姜濤無奈說：「你轟炸到我講唔到嘢，我哋冇綵排唔知會咁狀況，每年我唔係驚攞獎，係驚佢出嚟嗰吓唔知有乜發生，第一年我就O嘴。林海峰對我嚟講係好神秘人，我好多嘢想請教佢，佢點樣諗到嗰啲嘢，佢對我嚟講係改變咗我演藝事業方向，正所謂⋯我諗唔到。有獎固然好，但之後嘅路仲好長，我哋只要成為家人、最親嘅人『我最喜愛』就夠。」