采子懶理「雙重出軌」繼續抽水　唱舊愛邱鋒澤歌曲

台灣女星謝采紋（采子），自2021年被爆出同何孟遠「雙重偷食」後，就退出娛樂圈一直沉寂，直至今年先再宣布復出，並為自己25歲生日開騷慶祝之餘，仲唱埋舊愛邱鋒澤嘅歌，引嚟唔少網友質疑版權問題！

事實上，今年4月就復出嘅采子，喺一次公益演唱會上就曾透露因為版權問題，以後未必可以再唱舊歌，而佢目前所屬嘅經紀公司亦表示版權問題複雜難處理，並希望可以同邱鋒澤坐低，因應授權費用好好溝通，對此邱鋒澤旗下嘅經理公司則回應道：「公開演出的表演者要唱甚麼歌，無論在哪個市場，都需依照該市場規定走正常版權申請及詞曲公播權利。」

針對采子喺生日騷唱舊愛邱鋒澤歌嘅版權問題，采子經理人回應道：「演唱舊歌部分都有依照MUST（中華音樂著作權協會）的規定，走正常版權申請及詞曲公播權利即可。」雖然睇嚟就無版權問題，不過有唔少網友認為采子之前唔好好珍惜舊愛邱鋒澤畀嘅機會同資源，如今仲面不改色咁繼續唱邱鋒澤嘅歌，認真不知羞恥。