將大S同全智賢齊名　具俊曄死都記住重逢畫面

台灣女星徐熙媛（大S）老公具俊曄返韓錄製人氣綜藝《Radio Star》，初次公開兩人相隔23年後重逢畫面，尋晚（9日）節目正式播出，見到二人緊緊相擁後嘢都講唔出，錄影棚內具俊曄難掩情緒不停掉淚，哽咽直呼：「當我去世時，如果問我人生中最難忘的時刻，我應該會選那個時候！」感動到韓國主持人金國鎮狂拎紙巾拭淚。

具俊曄提到20多年前被大S倒追，佢飛台灣拍拖時必須戴假髮掩人耳目，二人又成日去東京約會，買埋情侶外套，無奈為人氣着想都係要分手。由於具俊曄主動提分手，原以為大S會怨恨自己：「分手後熙媛主演《流星花園》，穿着那件夾克拍，我也是分手後忘不了她…」

具俊曄更否認因冇錢先娶大S，佢表示呢啲言論都係嫉妒、誣告，更大讚大S喺台灣嘅影響力相當於韓國嘅全智賢，讚到大S天上有地下無。佢更大方公開示愛，指佢同大S嘅婚姻係一生都無法忘懷嘅珍貴回憶，二人會繼續共同走過人生每一個階段，直到白頭偕老，冧功出到盡。