Baby着A貨被斷正粉絲震怒　團隊即炒造型師

內地頂流女星Angelababy（楊穎），有着精緻五官及苗條身材嘅佢，向來都係廣告代言嘅寵兒，而日前身穿紫黑色禮服裙出席品牌直播嘅佢，就畀眼尖網友發現着假貨，並喺內地社交網掀起熱議。

身穿紫黑色禮服裙嘅Angelababy，盡騷苗條好身材外，整體性感又不失優雅氣質，中空設計更令飽滿上圍若隱若現，令人充滿遐想空間。不過靚還靚，係咪正版又另一回事，有眼尖網友就晒出宋茜早前着同款唔同色嘅禮服裙，並發現呢款禮服裙正版剩係有推出藍黑色，因此Angelababy身上嗰件純屬仿製嘅假貨！

眼見偶像着假貨，唔少Angelababy粉絲都相當憤怒，紛紛留言要求「撤換造型師」。對此，Angelababy後援會總會亦喺社交網表示：「工作室收到回饋後和造型團隊進行了溝通並尋找合適人選，目前工作室的答覆是執行造型師已更換，也歡迎大家監督後續的工作成果！」