吳宗憲揸名車撐阿仔場！現場怒斥鹿希派：唔好咁過份

台灣人氣真人騷《嗨！營業中》第2季即將播畢，向來嘉賓陣容鼎盛嘅節目，最後一集更邀請到VIP親友團坐陣，唔止有星級爸爸吳宗憲、李亞明現身力撐，仲有鬼鬼（吳映潔）、范少勳、王大陸及春風等，認真星光熠熠。

於日前公開嘅預告中，只見揸住名車入場嘅吳宗憲雖然就型到裂，不過見到老竇登場嘅鹿希派就表情有啲緊張，甚至有少少備戰狀態，而一見到仔仔嘅吳宗憲，亦即刻勁肉緊攬到實一實：「姐姐Sandy來看你，爸爸也來看你！我們吳家完勝。」認真驕傲呀！而見到老竇嚟捧場嘅鹿希派，工作時亦相當賣力，就連個肚都餓得比平時快呀！眼見李玉璽同老竇李亞明暖心互動分享嘢飲，鹿希派都忍唔住問道吳宗憲：「喝你的湯OK嗎？」正當鹿希派準備開心飲湯時，吳宗憲竟然大整蠱道：「你不要太過份！」嚇到鹿希派即刻放返低碗湯，認真搞笑呀！