梁朝偉黃偉文30年後再合照　揭絕核鼻鏈Look頂癮

已移居英國嘅著名填詞人黃偉文（Wyman），佢嘅圈中好友滿天下，當年佢仍然做DJ嘅時候，就已經同剛獲威尼斯電影節頒發「終身成就獎」嘅影帝梁朝偉結緣，不過多年來大家各有各忙，到今年終於都可以再得閒合照。

佢就晒出二人Chok爆合照，仲爆料梁朝偉次次去倫敦都係為咗餵雀，好在今次仲記得要搵老友見面：「哈哈，大家都搵唔番條鼻鏈出嚟。（有Keep先驚啦）真係足足30年之後先有機會再合照。再講咩邊個個樣變咗邊個冇乜點變都係多餘，骨膠原流失係自然定律，係對閱歷同智慧嘅奉獻，最緊要大家都算冇穿冇爛，仍然為自己所信所愛努力緊。」

佢仲借機晒出二人於1993年同樣戴上鼻鏈嘅合照，自嘲大家都骨膠原流失，青春不再。鼻鏈Look夠晒絕核，難怪網友都將重點放晒喺條鏈度，搞到網上嘩聲四起。