梁朝偉勇奪「金獅獎」載譽返港　現身機場捧獎座任影

影帝梁朝偉剛獲《第80屆威尼斯電影節》頒發「終身成就金獅獎」，成為史上首位榮獲該獎項的華人演員，今日（8日）他終於返港，載譽歸來。今早他無懼黑雨，搭飛機抵港，他現身機場時手持金獅獎獎座，全程表現興奮，滿面笑容。

梁朝偉受訪時，講到得獎心情，他表示：「同上次好唔一樣，因為上次係一部戲（攞獎），最感動係上到台啲人企晒起身鼓掌，覺得好似係自己對自己有交代，我成日覺得你做咁多年嘅努力，做咁多嘢，一個人你平時待人接物做嘢，唔係對人交代，係對自己有交代，嗰刻覺得呢41年總算係對自己有交代。（點解咁感觸落淚？）李安講我喺現場做嘢，我無意識到我係點，經過佢講發現原來我係咁，聽到我已經係少少（想喊），台下都係電影人，全部起身鼓掌好耐，所以個感受好唔一樣，好似係幾十年對自己一個交代。（李安手上攞令你加倍感動？）唔係，係好多樣嘢加埋，唔係一樣嘢。」

對於被讚為港爭光，偉仔謙稱電影並非一個人，而是一個團體的工作：「我諗咁多年來由我做電視台開始，由《430穿梭機》受好多好導演啟發有機會拍《新紮師兄》，唔通個獎又唔係屬於佢哋嘅咩，仲有茶水同服裝，所以我覺得係大家成就咗我，我好彩我上去攞。（所以你送獎畀香港電影。）我覺得係屬於大家，應該大家一齊分享，因為呢幾十年裡面，由82年到2023年，大家一齊合作過好努力向住一個理想進發，今日得到係每一個人都有份。」提到李安致辭時大讚他的眼神勝過千言萬語，他笑言自己不會意識到：「我點知呀，我淨係做。（覺唔覺得自己眼神好厲害？）我唔會意識到，我只係意識到我做咗好多準備，你睇一本書同一百本書好唔同，唔係眼神而係你成個人嘅信心都唔同，即係當時我拍《一代宗師》，如果唔係練咗咁多年你都冇嗰個信心，你冇呢種眼神，你係經過時間同訓練先有個信心。」

他坦承金獅獎是一直以來夢寐以求的獎項，他憶述：「其實我同威尼斯電影節嘅關係由89年開始，上一次係《色，戒》李安去攞，佢擺咗個奬喺度，跟住話大家嘅、大家嘅，我望到個奬，嘩，流口水呀，如果有機會就好喇，但呢啲唔係想就有，係好彩囉！（下個目標係奧斯卡？）依家拍戲反而唔似以前，依家係有最初出嚟拍戲嘅初心，中間經常會諗點去突破做好啲，依家係盡量去享受一班人一齊嘅旅程，同一班人盡自己最大能力做到最好，先係最好玩嘅地方。總之只要做好，就會有好效果同質素。」問到怎樣跟母親慶祝？偉仔透露由於母親年時已高不便出遊，今次回港會跟家人及朋友吃餐飯慶祝，但就不會搞慶祝派對了。

另外，偉仔透露明年三月便到德國開工，問會否加片酬？他認為最開心最重要：「拍一套戲同一班人開心緊要過你畀筆錢我，即係點解我會接部歐洲戲，第一亞洲拍過好多，荷里活片又拍過，歐洲片未拍過，咁啱有個導演為我度身訂造，我睇完佢嘅作品都屬於係一個好優秀嘅導演，我同佢做咗幾次Zoom，你覺得佢係一個可以信任嘅人，佢係好有修養但謙虛。」他稱今次為飾演腦神經科學家角色，他早於兩個月前已經在香港多間大學請教腦神經專家：「我今次計劃用八個月去準備，我一日睇四至六個鐘頭書。」偉仔得獎後到了英國抽空跟音樂人黃偉文（Wyman）見面，問他何時再唱歌？他自嘲：「鬼有人聽咩！」

此外，偉仔早前在韓國女團NewJeans歌曲《Cool With You》MV中亮相，講到合作緣由，他解釋NewJeans唱片公司的老闆剛好跟偉仔的一個朋友認識：「我話如果你可以滿足我三個條件就拍，第一我喺邊你就喺邊度拍，第二我個造型你唔可以管，因為係我創作角色，第三就係我只係得兩個鐘。（有冇做咗NewJeans粉絲？）好似佢哋係我嘅粉絲！」而提到黑雨下抵港，他就表示落機後才得知。