胡说八道会合体贺胡定欣生日　“小鲜肉”惊喜现身送花

视后胡定欣人缘甚好，今日（9日）42岁生日嘅佢，早前就获一班胡说八道会姊妹，包括胡杏儿、黄智雯、姚子羚及胡蓓蔚等为佢庆生，胡蓓蔚网晒合照，见佢哋扭作一团，场面温馨，连唔喺香港嘅李施嬅都透过视像送祝福，并隔空“合照”同框，大晒姊妹情，席间佢哋仲齐齐揸咪唱K，重拾青春情怀！

不过当晚原来仲有一位特别嘉宾，竟然有“小鲜肉”向胡定欣送花兼献吻，原来系陈山聪囝囝Jaco！众所周知，Jaco向来对胡定欣都好冷淡，经常请食“柠檬”，今次难得施冧功，即凼得寿星女劲开心，陈山聪留言笑指：“大家冇眼花，今日Aunti Nann大好日子，已经3岁嘅大佬终于主动出击！sister 祝你生日快乐、 身体健康、幸福美满、大红大紫、事业更上一层楼！”

另外，有消息指“胡说八道会”将于12月在美国洛杉矶及三藩市举行演唱会，网上流出海报，见6女独欠胡蓓蔚，改为伍咏薇担任特别嘉宾，引起不少网民热议：“点解冇最唱得嘅豹嫂”、“真正嘅歌手豹嫂竟然唔嚟？”