梁朝偉凱旋回港搵張叔平攬到勁肉緊　見林子祥又變拘謹

影帝梁朝偉從影逾40年，喺國際影壇上奪獎無數，而啱啱喺《第八十屆威尼斯電影節》獲頒發「終身成就金獅獎」嘅佢，更成為首位華裔演員獲得該最高榮譽，隨着梁朝偉凱旋回港，一舉一動都備受矚目。

凱旋回港嘅梁朝偉，日前喺社交網透露：「回香港第一個就想見你！」並晒出一張同香港電影界著名美術指導張叔平嘅合照，只見2人笑容滿臉兼容光煥發外，張叔平仲開心到勁肉緊咁攬實梁朝偉，而梁朝偉則成個小鳥依人咁挨晒落張叔平膊頭度。

至於第2個梁朝偉最想見嘅人，則係樂壇傳奇林子祥，只見梁朝偉晒出同林子祥嘅合照外，相比同張叔平嘅挨膊頭合照就稍顯拘謹，甚至連招牌「尷尬又不失禮貌嘅微笑」都出返嚟，睇嚟梁朝偉就算拎咗「終身成就金獅獎」，對住樂壇傳奇林子祥，都只係剩低「後輩」呢個身份。