鄧超自導自演電影傳蝕3億人仔　被疑似表姐爆患抑鬱

內地影星鄧超同太太孫儷係圈中模範夫妻，平時畀人印象係活潑開朗嘅鄧超，近日竟然被傳患上抑鬱症，令網民都好震驚！事緣鄧超今年初自導自演嘅電影《中國乒乓之絕地反擊》，口碑同票房都唔理想，仲傳虧咗3億人仔（3.27億港元），對佢好大打擊，有位自稱係鄧超表姐嘅網友爆料，話表弟鄧超患抑鬱，依家精神崩潰，目前仲需要接受心理治療，情況好糟糕！不過由於並冇拎出任何真憑實據，令唔少網友都係半信半疑。

至今鄧超未作出回應，有網民就發現孫儷早前於社交網發文，以做運動為主題，發放正能量，當中提到「不要去批評自己、請相信你自己」等字眼，令人估係咪同鄧超有關。