李多慧帶隊返韓做最索導遊　筠熹塞錢入心口畀貼士

韓國啦啦隊女神李多慧自加入台灣「樂天女孩」後，一舉一動都備受矚目，喺今年6月，啦啦隊副隊長曲曲、陳伊、筠熹、卉妮，以及李多慧，更受邀前往Lotte Giants釜山社稷球場任表演嘉賓，引嚟唔少球迷到場支持。

而喺日前，筠熹亦喺社交網晒出一段喺韓國任表演嘉賓嘅花絮影片，只見一行人啱啱落機就急急腳歎美食外，沿路上大家都有講有笑，期間筠熹更搞笑話李多慧其實唔靚女，李多慧則擺出自豪表情道：「多慧漂亮！」之後筠熹又再搞笑表示要將啲錢塞入李多慧心口做貼士，令李多慧忍唔住怕醜道：「變態！」另外，難得帶隊返自己地頭嘅李多慧，亦展現出豪爽一面，大方請啦啦隊成員飲嘢，不過面對隊員好似軍隊咁齊齊嗌「襟沙咪打」，李多慧始終都係忍唔住再次露出怕醜表情，認真可愛。