傳「翻版胡歌」出事失聯半個月　工作室首度開腔回應

內地藝人張魯一有着一副深邃五官嘅出眾外表，亦因撞樣頂流男神胡歌，畀網友封為「翻版胡歌」，而喺內地有着高企人氣嘅佢，近日竟然畀爆出已經失聯近半個月，甚至喺新劇飾演男二嘅佢，連劇組開拍都仍然冇影，引嚟外界關注。

據內媒報道，疑似失聯近半個月嘅張魯一，神隱程度連老婆都聯絡唔到外，連新劇開拍在即嘅劇組，都同樣搵唔到佢。對此，張魯一嘅工作室亦喺日前（20日），透過社交網回應道：「好猶豫呀，我要不要把張老師正在使用的手機號碼公布一下？」並晒出一張寫有「張魯一疑似失蹤半個月呀！」嘅相，不過就印上一個紅色大字「假」，澄清道張魯一目前正為新劇角色「閉關練功」，失聯一事根本係空穴來風，引嚟唔少粉絲留言道：「看吧，現在都是問你要手機號碼的，你給不給吧？」、「所以，手機號碼呢？」、「大家太想念他了！」、「給我手機號碼！」