衛詩雅為電影冇底線　新片極大轉變賣關子

自稱電影迷的衛詩雅，相隔1年將再次投入電影拍攝工作，今次無論角色及造型都有極大轉變，難怪近日她已積極備戰：「今次牽涉到體能訓練，所以我已經喺度健身，想全程投入。依家開始應該都唔會接其他工作住，希望到時企出嚟可以畀到大家耳目一新嘅感覺。早排太瘦喇，起碼都要練番啲肌肉先。」

她自言非常重視今次機會：「因為覺得角色有得發揮，同埋好嘅角色係要等嘅，我好鍾意為一套戲去改變自己。（會剪短晒啲頭髮？）未知，不過我係冇所謂，亦冇底線嘅，有需要剃光頭，甚至剃眼眉都得！為咗電影，我真係乜都冇所謂。（裸露呢？）睇劇本，唔係為露而露就得。」問到會否擔心男友詐型，她即大發嬌嗔避談，又回道：「有咩？」又轉換話題自爆稍後會聘用名師，教她苦練拳腳功夫。