【大夫收視勁】華姐冠軍超低胸救人　封無綫最索醫生

由蔡思貝同何廣沛主演嘅無綫新劇《你好，我的大夫》開播以嚟叫好又叫座，首周已經錄得最高22點收視。呢次係思貝第一次挑戰中醫角色，劇入面嘅中醫全部都係後生演員，顛覆中醫一直以嚟嘅傳統同嚴肅形象，有新意、有睇頭！其實無綫醫療劇一向都好出色，唔知以下邊套先係大家心中至愛呢？

華姐冠軍張曦雯（Kelly）喺第一輯《白色強人》着住超Deep V晚裝幫人急救超經典，性感得嚟又有知性美勁引人遐想！Kelly仲同其他女醫生唔同，長期短裙上陣騷長腿被網民大讚係「歷年最索醫生」。不過《白色強人》系列唔止有靚女睇，仲有三大視帝坐鎮，又大膽涉獵時事同政治話題，每集都勁精彩！

講起醫生又點可以唔提馬國明，佢足足演過15次醫生咁多！但《On Call 36小時》入面嘅「一件頭」，先真正奠定佢當家小生之位，劇集大結局平均收視37點，係無綫2012年最高收視嘅大結局，勁受觀眾歡迎。呢套仲係女主角楊茜堯同羅子溢定情之作，茜堯宣傳嗰陣已經話暗戀子溢甜到爆，講起都想重溫！