陳嘉慧結婚讚老公誓詞好文采　老爺話生夠6個會努力

現年27歲的無綫小花陳嘉慧今日（1日）於深圳出嫁，與拍拖半年的圈外男友Calvin拉埋天窗，有指他們選址在深圳擺酒是為了遷就親戚，亦有可能是陳嘉慧已經懷孕。不過婚禮現場保密功夫做到足，未有讓傳媒入場，但就有安排傳媒到宴會廳休息。而嘉慧身穿一字膊婚紗，大露事業線，性感搶鏡，而圈中好友游嘉欣、梁敏巧、王虹茵及彭翔翎則擔任姊妹團。

約下午六點，新娘嘉慧與一班姊妹團宴會廳會見傳媒，但新郎哥就未有現身。身穿拖尾Tube dress婚紗的嘉慧大騷白滑香肩，仙氣十足，一班姊妹在接受訪問時表示婚禮有不少感動場面，忍不住眼濕濕，而新娘子陳嘉慧受訪時表示老公並非富二代，只是普通人，但性格怕醜，問到給老公多少分時？她冧爆表示：「滿分，佢咩我都鍾意，多謝佢精心策劃咗呢個婚禮。（老公有冇同你講愛的宣言？）佢話一生一世，聽太太話就冇錯。佢寫嘅誓詞畀我想像中有文采，估唔到準備得咁好，聽到我好想喊，但我要忍住，我為求靚唔好整花咗個妝。」她指行禮時看到大家見證其婚禮，非常感動，而老公亦眼濕濕。她透露早前已在港註冊，今次嘉賓以親人為主，只有四位姊妹是圈中人，也是兩、三日前才通知她們，返港後會請同事食飯，也有通知高層樂易玲，問到婚後會否繼續演藝工作？她揚言會繼續當演員，老公亦十分支持她。

對於有指兩人拍拖半年便閃婚，她作出否認：「都拍咗拖好耐時間，但幾耐就當留一個秘密畀我哋。」她續謂對方是3月1日向她求婚，但鬧出不少笑話：「當時我啱啱瞓醒，佢話不如結婚，我以前佢講笑，我即時答應咗。到咗拍求婚片嘅時候，又唔記得除口罩，搞到要補拍，我冇諗過我人生大事就要Take2。」問到是否雙喜臨門，她同樣否認，稱生小朋友順其自然：「我同老公都好鍾意小朋友。（老爺話想你生6個？）我會努力加油，喺未停經前諗吓先。」

梁敏巧獲邀加入陳嘉慧婚禮姐妹團。談到好姐妹出嫁，她開心表示：「恭喜Erica（陳嘉慧），祝佢同老公白頭到老、求結同心及幸幸福福。我哋今朝5點半開始，所以都有啲攰，不過係開心嘅，喺兩、三日前我收到Erica嘅邀請，其實唔係好了解佢老公，今日算係首次見面，覺得佢好溫柔體貼，全程對眼都離唔開Erica，好好緊張佢嘅新娘打扮，睇得出佢好照顧及錫老婆，同埋好有紳士風度，會關心埋我哋啲姐妹。」她又大讚新郎風趣幽默，最感動是他準備的誓詞﹕「聽完先知道佢同Erica原來經歷咗咁多嘢。」

至於嘉欣祝福好友幸福快樂，並稱讚兩人合襯 :「睇住佢哋都覺得好甜蜜，佢老公對佢好體貼，好有心機打點好多嘢，希望佢哋一直甜蜜幸福美滿。」