多圖︱黃翠如五官愈嚟愈立體　24年容貌變化一文睇盡

藝人黃翠如近日出席活動時，就自爆同老公蕭正楠開聯名戶口，二人財政透明冇私己錢，不過網友就未有對佢哋嘅財政狀況感好奇，因為有網友指黃翠如容貌狀態愈嚟愈精緻，五官更顯立體。

網友就拎出佢歷年見人嘅靚樣做對比。1999年，17歲、讀中六嘅佢就已經積極參與傳媒工作，接受電台電視訪問，當時佢個樣最pure最true。2003年，佢入行擔任有線娛樂新聞台主播，因為Baby fat而仲有包包面，加上大量膠原蛋白，散發青春魅力。2007年，佢再轉戰有線節目組，曾同蘇民峰拍攝旅遊節目《40日峰狂嘆世界》，相隔4年佢輪廓已經變得立體，成功搣走肥腫面，逐漸變成瓜子面。

依家鼻樑變高、蘋果肌飽滿嘅佢，宣傳《使徒行者3》期間，苗僑偉更曾大爆黃翠如「整容」：「《使徒2》嘅時候佢係個𡃁妹，新一輯裏面佢當然成熟咗啦，過咗咁多年長大咗，佢又出咗去外地周圍走完，整埋容返嚟添！」