蘇韻姿加拿大「突發」粉絲聚會：窩心又感動！

蘇韻姿早前返回加拿大除了出席細佬婚禮，更與粉絲聚會，開心又感動：「今次粉絲聚會係好突然，因為今次只係返去兩星期，因為要幫手搞細佬婚禮，所以冇諗住搞粉絲聚會，但係有粉絲喺社交平台見到我返咗加拿大，於是就集合咗一班粉絲邀請我出席，真係好感動。」

在加拿大成長的蘇韻姿選美後一直在港發展，她以為也不會有太多人出席聚會，但場面令她大吃一驚：「初時冇諗過有咁多人嚟，場面好澎湃，估唔到多倫有咁多人支持我，有啲係熟悉面孔，有好多係未見過，好感激粉絲為我舉辦活動，好感動、好窩心，佢哋打氣令我充滿正能量。」

聚會上蘇韻姿與粉絲影相、簽名、唱歌、傾偈歡度了一個愉快下午：「自己感受到被愛包圍，今次返加拿大除咗親情，仲見到咁多人支持，自己作品喺半個地球咁遠都人支持，真係非常感恩，亦明白到呢啲支持唔係必然，自己會好好珍惜。有粉絲話支持咗我好耐，希望我多啲返多倫多，自己都要努力做好啲，都希望可以返加拿大返得密啲。」