何沛珈李芷晴挑戰自我　參加馬拉松賽事

去年於無綫《香港小姐再競選》勇奪冠、亞軍的何沛珈（Roxanne）以及李芷晴（Stephanie），今年繼續挑戰自我，分別參加不同馬拉松賽事，Roxanne參加10公里比賽，近期正積極備戰中，她笑言：「好開心呀，我不嬲都好鍾意跑步，但係第一次跑比賽，今次小試牛刀跑10公里，我嘅目標係一個鐘頭內跑晒，雖然平時跑開步，但係要跑10公里都有一定難度，因為天氣狀態都有影響。而家我嘅策略就係首先練習跑到一個鐘先，練習自己嘅耐性同埋耐力，跟住慢慢就可以開始練習速度。除咗跑我都會需要訓練肌肉，所以我都會做重訓練習。」

至於Stephanie則參加12小時慈善越野馬拉松，需行42公里山路，真的少點體能都未必能應付到，她謂：「成個路程大概係由大埔岀發，登上大帽山嘅山頂再落返城門水塘嗰邊，之後再兜返去大埔起點，所以都要慢慢訓練返個體能。」Stephanie早前曾接受過一次訓練，成功挑戰15公里，她謂：「行咗大概三份一嘅路程，當中都有啲山路同有唔少亂石嘅路，對於平時比較少行山嘅我都唔易行，開頭都有啲擔心體能上應唔應付到，但係估唔到原來個過程都幾開心，一齊行嘅隊友都讚我意志力比佢哋想像中高好多，行完個成功感都幾大。」