陳奕迅開騷拒被命令講國語　觀眾力撐拍掌歡呼

「歌神」陳奕迅（Eason）昨晚（13日）假澳門舉行巡唱，觀眾反應熱烈，不過在Talk位環節中發生小插曲。事緣他本來很開心和台下觀眾互動，向台下道謝，由於觀眾太熱情，舞台上的他多次被觀眾打斷說話，令他無奈謂：「我知你哋特別熱情，但係我個騷，每隻歌都係一個連貫性舞台劇咁，我唔會畀你哋影響到我，我要好集中去用歌講古仔。其他人都唔好畀呢啲聲音、畀人影響到，我知㗎，其實就係大家沉醉喺一個夢裡面，但突然聽到鬧鐘聲，又或者你阿媽叫你起身大叫咁....」

而繼續被打斷說話的他，頗為無癮說：「你再熱情我都係咁上下，其實我聽唔得到你哋叫緊咩，我所有熱情都留咗喺唱歌度，依家係演唱會，唔係傾偈會，我唔可以同你一個人講嘢，而唔理全場其他觀眾....我耳仔好敏感，我同你講緊嘢，其他聲又來，我聽唔到，我會好煩。」

此時又有一位觀眾以命令式口脗大叫：「講國語！」接着「講普通話」此起彼落，令Eason先以泰文打招呼作回應，然後說：「我想講甚麼語文就講甚麼！我可以講國語，可以很流利！你可以要求，你可以『唔該』、『請』、『麻煩你』 ，大家唔好誤會，就算今日有人咁樣叫我講英文，我都一樣會叫佢Shut Up！你聽唔明咪算囉 ！」全場觀眾即報以拍掌歡呼，他再說：「我唔知你哋鼓咩掌，如果David Bowie 喺度唱，你會唔會叫佢講國語！講講廣東話呀！奇怪！我都係塞番耳塞算。」

對於今次 Eason不肯被命令講國語，網民討論紛紛，最後更成為網上熱搜，百份之九十九的觀眾都支持他講廣東話，更有歌迷留言叫他到內地開唱都繼續講廣東話、唱廣東歌：「呢個先係我哋喜愛Eason嘅原因」，亦有網民則留言: 「我哋不嬲講粵語！聽唔明不要來」又有觀眾轟欠禮貌的觀眾：「搞到 Eason唔開心，嗰位冇禮貌嘅人認真羞家！」亦有網友以長篇指：「內地有56個民族，是一個多語言，多方言國家，你不能以語言文字，對人道德綁架，陳奕迅祖藉東莞，是一位粵語歌手，在粵廣澳開演唱會講廣東話，實屬正常。」

Eason則沒有時間去理會網民的討論，因為尚要全神貫注餘下8場演出，反而更關注自己的酒店睡床 :「我住喺咪碧咸設計間房，第一晚瞓得麻麻，因為張床係我史上瞓過最硬，我一路瞓，一路諗，碧咸咁特別設計，咁硬應該有原因，佢係一個運動員，可能瞓咁硬可以第日腰骨唔會咁攰，但係我瞓得好差， 第二日我拉開張床睇吓，下面原來係塊木板。」

他繼續追查硬床柀之謎，結果發現曾來李克勤亦曾瞓過同一張硬板床，又想得酒店職員曾問他對房間有何要求，結果他只是說了：「冇特別要求， 張床唔好咁軟就得。」可能因此而被安排跟克勤有同等「待遇」，幸好經過日前酒店再安排另一張「正常床褥」給他，令他有瞓好覺，可以再充滿能量繼續做騷。