黃曉明睇周杰倫騷大跳「龍拳」　手腳唔協調反被讚

台灣天王周杰倫（周董）近日喺上海舉行演唱會，雖然極難搶飛，不過都吸引到內地影帝黃曉明現身捧場，佢仲喺萬人面前大跳《龍拳》操，即使手腳唔協調，又跟唔上節奏，但竟然被網友一致大讚，意外地成為演唱會高潮位。

有指黃曉明本來一心諗住同周杰倫合唱，點知合唱前就有台灣藝人劉畊宏做嘉賓，對方竟喺台上公開邀請黃曉明一齊跳《龍拳》健身操，曉明二話不說當場答應，又喺台下獨自跳起，企正走廊中間左右抬腿、踢腿等，不過動作就似乎跟唔上節奏，加上佢邊跳邊呆笑，網民睇完片都話戥黃曉明尷尬，笑言佢完美詮釋咩叫︰「只要我不尷尬，尷尬的就是別人」同時又大讚揚佢夠晒可愛，帶咗幾分鐘嘅快樂畀觀眾。