中年好聲音2︱李振鵬深情獻唱大獲好評 鍾維着古裝化身「嫦娥」
2023年10月20日 19:01
東網電視
更多新聞短片
![](/hk/bkn/cnt/entertainment/20231020/photo/bkn-20231020190152963-1020_00862_001_01p.jpg?20231020172332)
無綫歌唱真人騷節目《中年好聲音2》周日晚(22日)播出嘅一集係60強淘汰賽最終回,當晚將揭曉30強最終名單。
前歌手鄭梓浩以親身經歷唱出《煙雨凄迷》,一身粉紫色西裝上陣嘅佢深情獻唱,主持人車婉婉問佢點解選唱呢首歌時,佢笑言:「啱啱返嚟香港時,我住喺細佬屋企,有一晚佢同女朋友有啲拗撬,我就被迫瞓咗公園成晚,所以我將呢個故事投放咗喺呢隻歌度,嗰晚真係落緊雨!」
而獻唱《最愛是誰》嘅李振鵬大獲好評,評判張佳添直言:「你把聲今日好鬆,好似按摩緊我耳仔咁,差啲懷孕!」陳慧嫻亦大讚:「好鍾意呢隻歌,我演唱會都有唱過,因為咁多年都諗緊呢隻歌(最愛是誰)嘅答案。」
其實振鵬都係有故事嘅人,今次參賽係為咗向天上嘅家人證明自己,佢講道:「我同家姐感情最深,家姐喺2012年時走咗,媽媽喺2015年(離世),爸爸就喺1996年(離世),細細個佢哋已經好支持我唱歌,依家佢哋走晒,我好想畀到一啲表現佢哋睇,想話畀佢哋聽我一直都好努力。」
今集最大睇頭,落喺最後嘅鍾維同林若盈嘅PK戰上!有「龍婷 2.0」之稱嘅鍾維,紮晒髻、穿上粉紅色古裝化身「嫦娥」,唱腔酷似鄧麗君嘅佢今次挑戰唱廣東歌《情義兩心堅》,不過評審嘅意見就出現兩極,有人認為佢唱出歌曲韻味,亦有人覺得格格不入。
至於上回合嘅2燈選手林若盈則獻唱《愛》,獲陳慧嫻大讚進步好大,佢即時淚腺失守!佢解釋唱《愛》嘅原因時,仲爆喊:「唱呢首係寄託咗對爸爸嘅情感,我同佢冇見十幾年,跟住佢出現番一個月,之後佢就過咗身,我唱嘅時候唔敢投放得太多,驚好似依家咁。」