张致恒认想再组BOYZ　合体要睇关智斌：问佢唔应该问我！

艺人张致恒（Steven）与太太雯雯近日密密拍片，继日前被批Hea答冇诚意后，今次2人认真得多，被问到最想老公改啲咩，雯雯直言不满Steven唔冲凉，Steven解释因平日要做家务及照顾小朋友，故三更半夜才有时间冲凉，雯雯则狙击指佢懒，又抱怨指校方要求父母做嘅事，Steven永远都唔记得或唔做，大闹对方借口多多。至于有网民再问为何迟迟唔离婚，雯雯表示：“其实系想离婚，但要考虑小朋友，小朋友要分开定点呢？咁所以咪仲坚持，撑到就撑。”

至于问到会否同关智斌合体再组BOYZ开骚，Steven直言：“应该都唔会喇啩，呢个问题唔应该问我，系问佢，应该系问想唔想，我就梗系想啦，自己曾经破坏咗一个咁好嘅机会，但基本上呢件事99%冇可能再发生，所以唔紧要啦，大家想睇可以上网重温演唱会，如果有DVD出都好，当作纪念。”老婆雯雯则表示都希望BOYZ可重组，又谓若成真，将会全家总动员撑场。