情纏18年！桂綸鎂「三人行」約會　冷落戴立忍肉緊攬友人

台灣金馬影后桂綸鎂同大17歲男友戴立忍，因合作電影《經過》相識相戀至今已有18年，可惜2人就從未公開認愛過。而喺日前，就有台媒直擊2人去餐廳約會嘅畫面，原以為係情侶撐枱腳，點知最後仲有個「第三者」出現，只見該名中性打扮嘅女友人，同桂綸鎂、戴立忍喺餐廳門口有講有笑之餘，桂綸鎂竟然仲從後環抱呢位朋友，而唔係攬實男友戴立忍，不過從相中可見，桂綸鎂同戴立忍交往多年，雙方互動亦猶如老夫老妻般自在。

而喺今年3月桂綸鎂則罕有咁喺訪問中坦言，自己遇上一位令佢感到安心自在、乜都可以盡情暢談嘅對象：「我覺得生命裏有這樣的人讓我很安心，好像是你定了個錨一樣。」雖然桂綸鎂未有指名道姓，不過都可以感覺到佢對呢段感情嘅認真。

雖然桂綸鎂同戴立忍情纏多年，但就鮮少同框，而睇番2人最高調放閃嘅時刻，更要追溯番2009年，戴立忍以自編自導的《不能沒有你》勇奪金馬獎「最佳原著劇本獎」上台時，咁啱擔任頒獎嘉賓嘅桂綸鎂，亦喺台上大方對男友獻上愛的抱抱，而呢一幕亦成為超稀有嘅經典畫面。