陳喬恩孖老公馬國遊食到舔舔脷　自爆身材走晒樣

台灣女星陳喬恩同馬來西亞富二代Alan去年結婚，婚後生活更係相當甜蜜，去邊都形影不離。而婚後鮮有幕前現身嘅佢，更係成日同老公周圍飛周圍玩，上月底更陪老公一齊返馬來西亞度假，一落地更被貼心老公安排咗一系列密集式美食行程，從炒麵、燒雞到肉骨茶等，同時陳喬恩更喺社交網晒出多張精緻美味嘅茶點靚相，不過隨着陳喬恩食得開心，身形似乎都跟住發福，令陳喬恩忍唔住感慨：「幾天前我還是瘦的。」引嚟唔少粉絲安慰道：「現在也很瘦呀！」、「沒事，你幾天後又瘦回來了！」、「女神哪時候胖過了？」、「能吃就是福呀！」、「敢問吃貨美女如何保持好身材？」似乎陳喬恩對自己稍為太苛刻，畢竟間唔中放縱一下飲食都唔算過分。