李璨琛細女Sucy頭髮少造型多　戴冷帽變身大頭青蛙

藝人李璨琛與太太梁志瑩（Sophia）育有兩名女兒，大女李元元（Lucy）及細女李斐斐（Sucy）可愛嘅樣子都成功俘虜咗一大班粉絲嘅心。細女Sucy因為頭髮仲少，經常畀媽咪打扮成唔同造型示人，模樣相當得意。

近日天氣開始轉凍，Lucy媽再有新搞作，將Sucy打扮成小青蛙，同家姐Lucy一齊出街遊玩。Lucy媽喺社交網分享咗佢哋兩個嘅相，相中Sucy戴着一頂青蛙造型嘅冷帽坐喺BB車，眼仔睩睩好得意，不過化身小青蛙嘅Sucy戴上冷帽後個頭大咗一倍，連Lucy媽都忍唔住笑佢人仔細細頭大大。之後Lucy媽又幫Sucy戴上頭巾，化成印度阿妹，唔少網民都留言指Sucy愈嚟愈似家姐。雖然Sucy依家頭髮少，但都可以梳出造型，Lucy媽就搵咗啲Cream 幫佢整返個中分頭，媽咪仲笑佢好似漢奸，認真搞笑。