馮盈盈做濕疹救星　營養師上身教整黃金椰奶勁Pro

前港姐冠軍馮盈盈讀營養學出身，依家重返校園修讀食品產業管理市場營銷碩士課程，同時亦努力經營個人channel，早前就拍片大晒21.5吋超幼腰肢，今次佢就轉教大家紓緩濕疹，內服就整黃金椰奶，外用就敷特製mark急救，對皮膚敏感及受濕疹困擾嘅網民好有用。

見佢先以專業知識同大家講解濕疹成因及食療方法等，佢就提到每5個人中就有1個人有濕疹，症狀通常有皮膚發炎、紅腫、出水、甩皮等，佢就指大家可以避免食濕熱水果、辛辣或刺激性食物、油炸或高脂肪食物、高糖分食物、食物過敏原及酒精類，仲即場自製一種譽為「濕疹救星」嘅黃金椰奶，用薑黃粉、黑胡椒、椰奶等製成，又提醒孕婦及哺乳中的婦女並不宜食用薑黃，夠晒專業。

另外佢又介紹埋外用方法，將防過敏嘅潤膚膏或面霜搽喺濕疹患處，敷上浸過蒸餾水的面膜紙，10分鐘後取走，有助止痕，同時佢又晒出白滑玉手，靚靚出鏡之餘，網民又學到嘢。