李連杰現身台灣宣傳新書　幽默回應「死訊」

武打巨星李連杰近年屢傳健康狀況亮紅燈，早前更離奇傳出死訊，事實上最近推出新書《超越生死：李連杰尋找李連杰》嘅佢，今日（16日）更一身全黑打扮現身台灣宣傳新書，而活動上李連杰嘅第一句竟然係：「大家早上好！我還沒死！最近大陸都在說我死了，已經10年了，還有1千多萬人關注，甚至還有人說，你死了這麼多次，怎麼還沒死？」幽默度爆燈咁回應「死訊」一事，亦笑翻現場眾人。

事實上，身為佛教徒嘅李連杰，新書中亦有提及佢嘅法號「覺遠」，而從國際巨星變成潛心鑽研佛法嘅佢亦分享道：「我一直很榮幸、很感恩，最近25年我跟很多法師學習佛法，很多人知道我拍電影、做公益，但不知道我花了25年，很努力想了解生死是甚麼。」原來出道多年嘅佢，經歷過唔少生死時刻，2004年喺馬爾代夫遭遇南亞海嘯，後又因《霍元甲》跌傷，以及喺青海發生嚴重高山症等，一年內3次嘅生死關頭，難怪李連杰對生死課題咁有研究。