林子祥成晚笑唔停　林德信太太肚凸凸疑双喜临门

歌手林子祥仔仔林德信（Alex）寻晚（16日）迎娶拍拖多年嘅圈外女友Candace，二人结婚照曝光，不过见新娘子全晚肚凸凸，疑似双喜临门，难怪新老爷林子祥笑得特别开心，佢都戥阿仔高兴！而今次婚礼都采取非公开形式，低调进行。

其实现年38岁嘅林德信一早就讲过有计划结婚，但对婚礼就未有透露半点风声，曾直言同女友已经拍足拖，有晒“七年之痒”，原来就系心痒痒想结婚。佢就话自己前两年都未谂婚事，但过咗疫情令佢对好多事嘅想法都有所改变，更表示觉得系时候做爸爸，不过父亲林子祥就冇催佢生B，只会工作上畀意见，但Sally（叶茜文）同其他长辈倾佢啲感情事，爸爸就会企旁边偷听，Sally同佢妈妈都冇直接问佢感情事。

而Alex就自爆同Candace系由共同朋友介绍而相识，大赞对方性格乐观，加上Alex自己好锺意小朋友，讲到明希望婚后有个大家庭。早前喺林家家庭聚会上，都见到Candace已融入家中。有指Candace系专业清酒侍酒师，曾被选为2020年清酒小姐，佢同Alex一样热爱运动，成日行山同做瑜伽。因保护Candace圈外人嘅身分，以往两人都甚少公开Post合照。