李佳芯《台慶》片段再次被打格　疑搞唔掂內地市場

無綫《萬千星輝賀台慶》尋晚（19日）完滿舉行，TVB內地官方平台同去年一樣都有直擊現場盛況，有網友留意到視后李佳芯（Ali）亦同去年一樣「被消失」，當畫面有佢出現時，就將佢個靚樣打格，似乎佢仍未攻得入內地市場。TVB官方微博上載照片及短片，照片中唔見Ali蹤影，僅見到佢現身一張遠鏡大合照；而片段中當陳慧嫻演唱《回家》及《跳舞街》時，Ali被影到大頭時就打上厚格。

其實去年台慶開Live時，當Ali同陳展鵬出場，官網就突然中斷直播，插播劇集宣傳片，已經令人摸不着頭腦，嘗試打出「李佳芯」時，屏幕顯示「你發表的內容不符合法規，無法發送」，「李佳芯」變為敏感詞，今年再次出現類似情況，令網民揣測佢仍未被「解封」。