謝霆鋒教整港式餐蛋治　一步驟出錯被網民嫌邋遢

男神謝霆鋒被外界肯定廚藝獲封「Chef Lemon」，最近忙於拍戲嘅佢，比較少同大家分享煮嘢食樂趣，日前佢終於喺社交網晒咗條片，用佢自成一派嘅方法教大家整港式餐蛋治！首先，佢將所有食材井井有條咁放喺枱面，之後就將麵包擺喺錫紙上面放入焗爐，佢連麵包都有自己一套獨有烘法，令網友都話獲益良多！

然後，佢將各種材料包括生菜，酸瓜、餐肉同雞蛋放喺烘好咗嘅麵包上，不過佢放煎好咗嘅荷包蛋時，唔小心整穿咗個蛋黃，啲蛋黃汁流晒出來，搞到成枱都係，令網民覺得唔夠完美，仲話覺得有啲邋遢囉，不過有網民就力撐佢話，呢個餐蛋治賣相非常好，真係睇見都想食呀！