麥明詩周日加班超厭世　枱底春光惹遐想

「十優港姐」麥明詩（Louisa）近年淡出娛樂圈，並轉戰做顧問嘅佢，早前更擔任教育集團非執行董事，事業經營得有聲有色。而頭銜多工作自然亦多咗，今日（26日）麥明詩更喺社交網晒出在家工作嘅厭世樣，透露因為之前抽起咗一日去拍攝廣告，所以今日星期日都要繼續工作，追番進度，另外仲特別多謝幫佢影呢張相嘅攝影師，雖然麥明詩就冇特別指名道姓，不過八九不離十都係男友盛勁為。

而相中嘅麥明詩雖然素顏兼居家Look示人，不過激短裙下嘅白滑美腿仍然相當搶Fo。另外，除咗麥明詩嘅厭世樣及美腿吸睛，Pat Pat下嘅人體工學跪坐櫈亦同樣勾起唔少網友好奇之餘，電腦枱前嘅無敵海景，更引嚟唔少網友搞笑留言：「間房仲大過我間公屋，咩料？又有大窗，我4面都係牆，公平咩？」