娛圈單打︱網民力捧做男一 大強個仔好鬼得

2023年11月28日 00:01
東網電視
更多新聞短片
憑《愛‧回家之開心速遞》朱凌凌一角成功入屋的吳偉豪(Ricco),最近獲網民開Po力撐,直指他靚仔、年輕、演技有進步,早應登上男一之位,奇怪為何TVB獨愛周嘉洛,卻冷落了大強個仔!
當然,又唔可以話TVB唔捧Ricco,起碼他在《萬千星輝頒獎典禮2022》已獲得「飛躍進步男藝員」獎。早前拍住女神李佳芯的《有種好男人》,飾演女神個仔,同樣惹起話題。之不過,比起周嘉洛劇接劇做男主角,25歲的Ricco,機會始終差咁啲。
網民紛紛替他不值,仲話Ricco演技比周嘉洛自然,外形亦更討好,總好過後者成日扮周星馳!咁講啦,人比人,氣死人,Ricco外形的確較優勝,但周嘉洛勝在活潑生鬼。現在正值大台用人之際,相信TVB絕對唔會浪費人才嘅!
話時話,外界對Ricco最有印象之處,除了他是《中年好聲音》吳大強個仔,就要數2020年,佢同年長他10歲的火辣女友被踢爆Staycation禁室培慾,二人仲將「爆房」酒店單人相放上社交網,終於因為房間背景一樣而被外界揭發關係!Ricco惟有焗住認愛,無奈戀情見光即死,分手不久更有「沖涼摸J片」在網上流傳,轟動一時!
此後Ricco又同較他年長的落選港姐何泳芍(Honey)傳緋聞,外界仲繪影繪聲話二人又去Staycation,睇嚟Ricco見過鬼唔怕黑,有鋪「開房」癮喎,呵!但隨着「摸J片」事件發生,女方落閘話大家唔熟,緋聞不了了之。