黎諾懿細仔小冬牛曝光　精靈大眼同哥哥倒模一樣

藝人黎諾懿同老婆李潔瑩轉眼結婚9年，育有6歲大仔「小春雞」黎峰睿及歲半細仔「小冬牛」黎奕辰，雖然黎諾懿不時帶大仔小春雞現身活動、上節目，甚至喺社交網晒出大仔嘅得意樣，不過細仔小冬牛就相反，即使就嚟已經2歲，但都冇乜人見過小冬牛。

而黎諾懿日前亦喺社交網晒出小春雞去主題樂園玩嘅相外，竟然仲有細佬小冬牛，黎諾懿亦寫道：「好多人都話冇見過小冬牛，小冬牛就快2歲啦！」只見着上南瓜裝嘅小冬牛，一時睇魚一時玩水，相當開心之餘，同哥哥小春雞更係餅印一樣，一大一細認真趣致得意，引嚟唔少網友激讚： 「咁得意點得㗎？」、「小冬牛大個咗咁多㗎喇！」甚至仲有唔少網友睇相唔夠喉，希望黎諾懿可以拍多啲小冬牛嘅影片分享。