羅啟豪宣布下月開騷自爆宣傳海報用AI設計

無綫歌唱真人騷《中年好聲音》季軍羅啟豪獲獎後工作不斷，為答謝粉絲支持，啟豪決定於下月23日在旺角麥花臣場館舉行一場音樂會，與一眾粉絲齊齊迎接聖誕，由於音樂會取名為「冬日約會 Winter Rendezvous」，名字既溫暖又浪漫，原來此乃啟豪的意思。

為配合音樂會主題，啟豪特別穿上暖笠笠家居服，並一臉休閒坐在充滿聖誕布置的客廳中，他說：「呢幅相嘅畫面係我同我粉絲團隊一齊諗出嚟，但時間關係，我哋覺得好難搵到一個理想嘅場地去影呢幅相。呢個唔係我英國或香港嘅屋企，一來我已經搬番晒啲嘢返香港，英國依家無屋企，二來就因為我前幾個月先搬返嚟，但一直都忙無時間執屋，所以屋企仲好多好多箱嘢未拆，周圍都係嘢，間屋完全唔見得人！呢幅相其實係我哋用AI繪圖做出嚟，然後坐嗰張梳化就係喺朋友屋企度影嘅，最後將兩幅相合成埋一齊就變成呢個成品。」身為平面設計師的他，笑指粉絲也頗滿意海報製成品，令其相當滿足。