李元玲晒收身餐　怒斥「楊冪減肥食譜」根本亂噏

馬來西亞「鋼琴女神」李元玲，琴技出眾嘅佢亦因熱愛健身，有住一副傲人嘅玲瓏浮凸身材，人氣高踞不下。而日前，隨着內地網友掀起「楊冪減肥食譜」討論，對減肥不嬲都有心得嘅李元玲，亦特地透過社交網澄清「不吃肉，飯只吃兩口」嘅錯誤資訊。

李元玲喺社交網分享咗段《楊冪瘦身法》之「不吃肉，飯只吃兩口」，直言唔明點解大家認為食肉係致肥元兇，並解釋道「瘦肉=蛋白質」，擁有充足嘅蛋白質攝取，先可以支撐身體所需消耗，而且蛋白質更係構成人體組織嘅重要成分，如頭髮、皮膚、器官、骨骼、肌肉及神經等都係由蛋白質組成外，李元玲亦強調道：「白飯可以不吃，但優質碳水是餐中不可缺少的食物之一！網絡上真的太多這種胡扯的，減肥方法不要亂跟！」最後亦附上一張自己整嘅營養餐畀大家參考。