「阿七」吳嘉儀新婚唔夠4個月　疑被趕出家門無家可歸

藝人吳嘉儀（阿七）去年於《開心無敵獎門人》中擔任新長老，憑着亮眼表現及健康形象，成功入屋。而早前佢更宣布喜訊，將同圈外男友「豬仔」Leo拉埋天窗，雖然阿七升呢做人妻，不過向來寵粉絲嘅佢，結婚未到半個月就喺社交網大解放，晒出多張性感比堅尼靚相。

然而，新婚冇耐嘅阿七，雖然喺社交網頻晒恩愛，不過結婚唔夠4個月嘅阿七，日前竟然喺社交網直言：「唔好講幸福喇，連抖啖氣都有困難。」並接連呻道：「#話我擺3枝送比家人嘅護膚品喺車後座會整花佢㗎車啲皮。（已提出搵到任何𠝹花痕迹，我願意照價賠償！）」、「#每日被話蠢話麻煩話污糟100次！」、「#又唔係未試過被改密碼鎖無家可歸。」、「又唔係未經過比人成衣櫃衫掟出大門。」、「#要求認真反省其當欺凌作玩笑的性格問題！」

雖然阿七就未有指明道姓鬧緊邊個，不過綜合佢抱怨嘅內容，似乎發洩不滿嘅對象都係同一位，其中一句：「日日都對住啦，使咩維繫感情呀？」引嚟唔少網友揣測似乎係鬧緊老公！

而隨着事件持續發酵，阿七今日亦喺社交網留言道：「想靜一靜，多謝各位朋友問候，一言難盡，請畀空間我重整自己。」並透露現階段更希望專心休息及專注工作：「這事情無對錯，只係我倔強執着，前因是自己選擇，後果必須由我自己承擔。」更真情剖白道自己付出及改變咗唔少，亦希望對方能為自己改變：「我渴望得到一個誠懇的道歉，看得見的態度改善。不喜歡用無謂的鬥氣方式波及、麻煩到身邊的人。」最後阿七亦不忘寫道：「謝謝大家關心不用憐憫我。」