歐陽娜娜清純不再　23歲大個女半裸瞓草地任影

台灣23歲藝人歐陽娜娜一直打住純純兔形象，惟今年重返校園後就多次大解放，Deep V、谷胸、Bra Top樣樣齊，最近佢就推出兩張寫真實體專輯，包括首張國語專輯《The Star 初星》及原創英文專輯《Live Today》，佢為專輯內精美寫真集更加博到盡，其中一輯相就見到佢半裸瞓草地，大秀纖瘦性感玉背，證明自己真係大個女。

歐陽娜娜於相中紮起cutie孖辮，上半身冇着衫咁趴喺草皮上，仲Close up上半身全裸背影，被網友讚性感又有質感，另一輯相就見她佢着吊帶衫喺海邊戲水，清新大晒初戀feel。不過亦有網友睇唔慣佢sell性感，加上輯相係黑白模式，竟有網友高呼好恐怖，話佢披頭散髮似足女鬼。