森美大阪遊激罕放閃　銀杏樹下拖索妻勁浪漫

向來熱愛戶外運動嘅藝人森美，平時放假唔係約埋朋友去揸電單車就係打籃球，而最近同老婆去咗大阪蜜月嘅佢，唔止喺社交網晒出睇銀杏樹嘅靚相外，仲晒出一段2人拖手嘅閃光影片，認真甜蜜又浪漫。

今日（9日）森美喺社交網晒出多張唯美嘅銀杏樹靚相，並寫道： 「秋天黃葉嘅代表，大阪，雖然銀杏樹好多都已經落晒葉啦，不過都仲有啲黃色等緊你，晏啲畀埋紅色嘅參賽者紅葉嘅相片畀你睇吓。」原本以為睇銀杏樹嘅靚景，未料其中竟然夾咗段森美同老婆陳雅嫻拖住手，勁浪漫咁喺銀杏樹下散步嘅影片，雖然森美同老婆剩係得背影出鏡，不過僅憑一對纖幼小腿就睇得出，身為1子1女之母嘅陳雅嫻，仍然保養得宜身材Fit到漏，唔少網友見到森美激罕放閃，都忍唔住留言激讚好Sweet呀！