唐詩詠讚「二嫂」湯洛雯冇得彈　爆婚禮冇搶花球

藝人唐詩詠今晚（16日）素顏現身文化中心睇騷，表示在泰國參加「二哥」馬國明和湯洛雯的婚禮，感受溫馨、感動又搞笑，自己喊足一日，由早喊到晚，但全部是開心的眼淚，指林子善最快喊，由早上斟茶儀式開始便感動到喊，因為是大家好期待的一日：「睇到每個細節，『二嫂』嘅付出，好細心，好關心我哋所有嘢，安排得好好，佢自己雖然好攰，但keep住問我係咪OK，話辛苦我，所以好感動馬國明搵到個好好嘅老婆。」又指向來甚少說話的馬國明，在宣誓時好搞笑。

其實詩詠只見過靚湯一次，在TVB時未曾合作拍劇，但經過今次，對靚湯有更多了解：「原來二嫂好正，成個婚禮都係佢自己諗，場地好正（第時你搵佢幫你搞婚禮？）哈哈！希望一樣咁落力。」對於花球落在高海寧手上，她笑指靚湯鎖定兩個目標，一個是高海寧，一個是她，但自己沒有去搶。今次鐵馬家族獨欠「大哥」鄭嘉穎，會否美中不足？詩詠說：「最緊要二哥OK，佢OK我哋就OK。」

她稱只看安排就感受到鐵馬是被重視，好緊要的人，平時去婚禮，她好快走，但今次留守到最後。