張藝興旗下娛樂公司被列為經營異常　粉絲憂男神出事

內地男星張藝興曾經係韓國天團EXO成員，返內地發展後更係偶像頂流，早前佢唱而優則演，主演嘅電影《孤注一擲》累積已錄得超過38億人民幣(約41億港元)票房，人氣旺盛。不過男神野心不止於此，佢近日積極投資開設娛樂公司簽新人，其染色體娛樂公司亦派練習生四出參加選秀節目，逐步建立演藝王國。惟近日張藝興嘅染色體娛樂發現被列為經營異常，引發熱議。

對此，公司官網回應稱一直處於正常經營狀態：「因公司聯絡資訊未更新導致今日情況發生，我司已第一時間與相關部門聯繫，目前在推進處理中。我司一直處於正常經營狀態，感謝大家關注。」據調查顯示，長沙染色體娛樂集團有限公司由張藝興持股99%，即係張藝興為大老闆，今次公司被列為經營異常，有粉絲擔心男神係咪「出事」，加上近年多位藝人相繼被軟封殺，憂張藝興唔知會唔會有咩行差踏錯。