莊子璇玩邪惡視角　游嘉欣何沛珈火辣賀聖誕

今年大家過咗個寒冷嘅聖誕，雖然係咁，唔少女星都依然火辣辣，好似應屆港姐冠軍莊子璇、前港姐何沛珈同無綫上位小花游嘉欣，齊齊喺尋日（24日）平安夜於社交網大晒性感相，令網民都睇到㷫合合！

莊子璇晒咗條挑戰手勢舞嘅片，以白色低胸Tube Dress上陣嘅佢，盡騷事業線，玩到興起仲烏身倒奶，大玩邪惡視角，令網友都熱血沸騰呀！佢留言：「雖然香港冇雪，但可以跳番首初雪，講完都覺得好凍#平安夜快樂。」

游嘉欣就晒咗條早前為工作拍攝嘅花絮片，佢以跌膊Deep V透視長裙上陣，大晒深長事業線，加上兩側腰間透視效果，身材若隱若現，相當養眼，佢留言：「一日公主限定！#拍攝花絮 #影幾耐都好享受。」而有網友就話睇見佢咁凍天氣，仲着咁少布開工，大讚佢好專業。何沛珈就以低胸開窿裙「應戰」，Big爆感十足，加上燦爛笑容，同大家講「Merry Christmas」，迷倒唔少網民呀！