娜扎剃光頭遭同學嘲笑　霸氣反擊：我長得夠美

「新疆四美」之一嘅內地女星娜扎，出名樣靚身材正，近期佢每次出席活動嘅造型都秒殺全場，舉手投足散發自信，完勝其他女星，因此被網民封為「新一代紅氈女王」。但原來女神由細到大都係自信心爆棚，日前佢喺綜藝節目《火星情報局》中自爆小學時期因為頭髮髮質差，被爸爸逼住剃咗光頭，希望可以令髮質變好，但當時貪靚嘅佢不願以光頭示人，於是買咗頂假髮戴住返學。

怎料有一次佢冇固定好假髮，喺體育堂跑步時，假髮被風吹走，「我那一刻整個人傻掉，就那一刻，耳鳴了。」而一旁嘅男同學見到後，即刻指住佢大笑，令佢非常生氣，衝上去大喊：「怎麼了！不就是光頭，怎麼了！」仲一邊拍打住自己嘅光頭，佢笑言當時自己就好似個癲婆狂罵，「你一出生就是長頭髮嗎」、「我就是猴子怎麼了」將男同學嚇到唔敢出聲。佢表示當時自己心諗：「我怕甚麼？我長得夠美，我有甚麼好怕的？」而呢件事之後亦令佢變得更加自信。